ന്യൂഡൽഹി: പ്രമേഹമോ ഉയർന്ന കൊളസ്ട്രോളോ പുകവലിയോ പോലുള്ള യാതൊരു ആരോഗ്യപ്രശ്നങ്ങളുമില്ലാത്ത, തികച്ചും ആരോഗ്യവതികളായ യുവതികളിൽ ഹൃദയാഘാത സാധ്യത വർധിക്കുന്നതായി ആരോഗ്യ വിദഗ്ധരുടെ മുന്നറിയിപ്പ്. 30-കളിലും 40-കളിലും പ്രായമുള്ള സ്ത്രീകളിൽ കണ്ടുവരുന്ന ഈ അപ്രതീക്ഷിത ഹൃദയാഘാതത്തിന് പിന്നിൽ ‘സ്പോണ്ടേനിയസ് കൊറോണറി ആർട്ടറി ഡിസെക്ഷൻ’ (SCAD – സ്കാഡ്) എന്ന അപൂർവാവസ്ഥയാണെന്ന് ഗവേഷകർ വ്യക്തമാക്കുന്നു.
സാധാരണയായി ഈസ്ട്രജൻ ഹോർമോണിന്റെ സാന്നിധ്യം രക്തക്കുഴലുകളുടെ ഇലാസ്തികത നിലനിർത്താനും വീക്കം തടയാനും സഹായിക്കുന്നതിനാൽ ആർത്തവവിരാമത്തിന് (Menopause) മുൻപ് സ്ത്രീകളിൽ ഹൃദ്രോഗ സാധ്യത കുറവായിരിക്കുമെന്നാണ് കരുതപ്പെട്ടിരുന്നത്. എന്നാൽ ഈ ധാരണകളെ തിരുത്തിക്കുറിച്ചുകൊണ്ടാണ് പുതിയ പഠനങ്ങൾ പുറത്തുവരുന്നത്.
എന്താണ് ‘സ്കാഡ്’ (SCAD)?
സാധാരണ ഹൃദയാഘാതങ്ങളിൽ കൊഴുപ്പ് അടിഞ്ഞുകൂടിയോ രക്തം കട്ടപിടിച്ചോ ആണ് ധമനികളിലെ രക്തയോട്ടം തടസ്സപ്പെടുന്നത്. എന്നാൽ ‘സ്കാഡ്’ അവസ്ഥയിൽ ധമനികളിൽ ബ്ലോക്ക് ഉണ്ടാകുന്നതിന് പകരം, ഹൃദയത്തിലേക്ക് രക്തമെത്തിക്കുന്ന ധമനിയുടെ ആന്തരിക പാളിയിൽ പൊടുന്നനെ ചെറിയൊരു കീറലോ (tear) ചതവോ ഉണ്ടാവുകയാണ് ചെയ്യുന്നത്. ഇതോടെ ഈ പാളികൾക്കിടയിലേക്ക് രക്തം കയറിക്കൂടുകയും ധമനി ചുരുങ്ങി ഹൃദയപേശികളിലേക്കുള്ള ഓക്സിജൻ പ്രവാഹം നിലയ്ക്കുകയും ചെയ്യുന്നുവെന്ന് മേയോ ക്ലിനിക്കിലെ കാർഡിയോളജി വിഭാഗം മേധാവി ഡോ. രാജീവ് ഗുലാത്തി വ്യക്തമാക്കുന്നു.
‘സ്കാഡ്’ ബാധിക്കുന്നവരിൽ 80 മുതൽ 90 ശതമാനവും സ്ത്രീകളാണ്. 50 വയസ്സിന് താഴെയുള്ള സ്ത്രീകളിൽ ഉണ്ടാകുന്ന ഹൃദയാഘാതങ്ങളിൽ മൂന്നിലൊന്നിനും കാരണം ഈ അവസ്ഥയാണെന്ന് എയിംസ് (AIIMS) പ്രൊഫസർ ഡോ. അംബുജ് റോയ് ചൂണ്ടിക്കാട്ടുന്നു.
കാരണങ്ങളും ലക്ഷണങ്ങളും
-
ഹോർമോൺ വ്യതിയാനങ്ങൾ: പ്രസവത്തിന് തൊട്ടുപിന്നാലെയുള്ള ആഴ്ചകളിലാണ് ഇതിന്റെ തോത് കൂടുതലായി കണ്ടുവരുന്നത്. ഈസ്ട്രജൻ, പ്രൊജസ്ട്രോൺ ഹോർമോണുകളിലെ വ്യതിയാനം രക്തക്കുഴലുകളിലെ കൊളാജന്റെ ബലം കുറയ്ക്കാൻ ഇടയാക്കുന്നു.
-
മാനസിക–ശാരീരിക സമ്മർദ്ദം: അമിതമായ മാനസിക സമ്മർദ്ദവും കഠിനമായ വ്യായാമങ്ങളും ഇതിന് പ്രേരകമായേക്കാം. പുരുഷന്മാരിൽ കഠിനമായ വ്യായാമമാണ് കാരണമെങ്കിൽ സ്ത്രീകളിൽ മാനസികസമ്മർദ്ദമാണ് പ്രധാന വില്ലനാകുന്നത്.
-
ലക്ഷണങ്ങൾ: 90 ശതമാനത്തിലധികം രോഗികളിലും കഠിനമായ നെഞ്ചുവേദന തന്നെയാണ് പ്രധാന ലക്ഷണം. ഇസിജി പരിശോധനയിലും മാറ്റങ്ങൾ കാണാം.
ചികിത്സയിലെ വ്യത്യാസം
പരമ്പരാഗത ഹൃദയാഘാത ചികിത്സകളിൽ നിന്ന് വ്യത്യസ്തമാണ് സ്കാഡിന്റെ ചികിത്സാരീതി. ധമനി പൂർണമായി അടഞ്ഞിട്ടില്ലെങ്കിൽ പലപ്പോഴും ആൻജിയോപ്ലാസ്റ്റിയോ സ്റ്റെന്റോ ചെയ്യാറില്ല. കാരണം, സ്റ്റെന്റ് ഇടുന്നത് ധമനിയിലെ വിള്ളൽ വലുതാക്കാൻ സാധ്യതയുള്ളതിനാൽ രക്തസമ്മർദ്ദം നിയന്ത്രിക്കുന്നതിനുള്ള മരുന്നുകളിലൂടെ ധമനി തനിയെ ഉണങ്ങാൻ കാത്തിരിക്കുകയാണ് പതിവ്.
സാധാരണയായി ഹൃദ്രോഗ സാധ്യതയില്ലാത്ത യുവതികളാണെങ്കിലും കഠിനമായ നെഞ്ചുവേദന അനുഭവപ്പെട്ടാൽ അത് അവഗണിക്കരുതെന്നും എത്രയും വേഗം വിദഗ്ധ ചികിത്സ തേടണമെന്നും ഡോക്ടർമാർ ഓർമിപ്പിക്കുന്നു.