യൂറോപ്യൻ രാജ്യങ്ങൾ സന്ദർശിക്കാൻ ആഗ്രഹിക്കുന്ന പലർക്കും ഷെങ്കൻ വിസ (Schengen Visa) ലഭ്യമാക്കുക എന്നത് പലപ്പോഴും വലിയൊരു തലവേദനയാണ്. ഒന്നിലധികം രാജ്യങ്ങളിലെ ഹോട്ടൽ ബുക്കിംഗുകൾ, വിമാന ടിക്കറ്റുകൾ, സാമ്പത്തിക രേഖകൾ, ഇൻഷുറൻസ് എന്നിവയെല്ലാം കൃത്യമായി തയ്യാറാക്കുക എന്നത് ഏറെ സങ്കീർണ്ണമായ കാര്യമാണ്. എന്നാൽ, യാതൊരുവിധ വിസ ഏജന്റുമാരുടെയും സഹായമില്ലാതെ വെറും രണ്ട് ദിവസത്തിനുള്ളിൽ ഷെഞ്ചൻ വിസ സ്വന്തമാക്കിയ അനുഭവം പങ്കുവെക്കുകയാണ് ട്രാവൽ കണ്ടന്റ് ക്രിയേറ്ററായ ശിവാനി ബൻസാൽ.
25 ദിവസത്തെ യൂറോപ്പ് യാത്രയ്ക്കായി എട്ട് രാജ്യങ്ങൾ സന്ദർശിക്കാനാണ് ശിവാനി വിസയ്ക്ക് അപേക്ഷിച്ചത്. കൂടുതൽ രേഖകൾ ഫയലിൽ കുത്തിനിറയ്ക്കുന്നതിലല്ല, മറിച്ച് അപേക്ഷ പരിശോധിക്കുന്ന ഉദ്യോഗസ്ഥർക്ക് യാത്രാപദ്ധതി എളുപ്പത്തിൽ വ്യക്തമാകുന്ന വിധത്തിൽ സമർപ്പിക്കുന്നതിലാണ് കാര്യമെന്ന് അവർ ചൂണ്ടിക്കാട്ടുന്നു. വിസ എളുപ്പത്തിൽ ലഭിക്കാൻ തന്നെ സഹായിച്ച മൂന്ന് പ്രധാന കാര്യങ്ങളും സഞ്ചാരികൾ ശ്രദ്ധിക്കേണ്ട നിർദേശങ്ങളും അവർ പങ്കുവെച്ചു.
സഞ്ചാരികൾ ശ്രദ്ധിക്കേണ്ട 3 പ്രധാന കാര്യങ്ങൾ
1. യാത്രാപദ്ധതിയിൽ (Itinerary) വ്യക്തത വേണം
ഒന്നിലധികം ഷെങ്കൻ രാജ്യങ്ങൾ സന്ദർശിക്കുമ്പോൾ നിങ്ങളുടെ യാത്രയുടെ റൂട്ട് യുക്തിസഹമായിരിക്കണം. ഒരോ രാജ്യത്തെയും താമസസൗകര്യം, യാത്രാ മാർഗ്ഗങ്ങൾ എന്നിവ യാത്രാപദ്ധതിക്ക് അനുയോജ്യമായിരിക്കണം.
-
പ്രധാന നിയമം: ഒന്നിലധികം രാജ്യങ്ങൾ സന്ദർശിക്കുമ്പോൾ, നിങ്ങൾ ഏറ്റവും കൂടുതൽ ദിവസങ്ങൾ ചെലവഴിക്കാൻ ഉദ്ദേശിക്കുന്ന രാജ്യം വഴിയാണ് വിസയ്ക്ക് അപേക്ഷിക്കേണ്ടത്. ശിവാനിയുടെ യാത്ര ആംസ്റ്റർഡാമിൽ നിന്നാണ് ആരംഭിച്ചതെങ്കിലും, ഏറ്റവും കൂടുതൽ ദിവസം ചെലവഴിക്കാൻ തീരുമാനിച്ചത് സ്വിറ്റ്‌സർലൻഡിൽ ആയതിനാലാണ് അവർ സ്വിസ് എംബസി വഴി അപേക്ഷ സമർപ്പിച്ചത്.
2. കൃത്യവും വിശദവുമായ കവർ ലെറ്റർ (Cover Letter)
യൂറോപ്പ് സന്ദർശിക്കാൻ ആഗ്രഹിക്കുന്നു എന്ന് അറിയിക്കുന്ന ഒരു സാധാരണ കത്ത് മാത്രമല്ല കവർ ലെറ്റർ. നിങ്ങളുടെ യാത്രാ ഉദ്ദേശ്യം വ്യക്തമാക്കുന്ന പ്രധാന കണ്ണിയാണിത്.
-
യാത്രാ റൂട്ട്, ചെലവുകൾ എങ്ങനെ കണ്ടെത്തുന്നു, നിങ്ങളുടെ തൊഴിൽ/ബിസിനസ് വിവരങ്ങൾ എന്നിവ ഇതിൽ വ്യക്തമാക്കണം.
-
ഏറ്റവും പ്രധാനം, യാത്ര കഴിഞ്ഞാൽ സ്വന്തം രാജ്യത്തേക്ക് തിരികെ മടങ്ങുമെന്ന് ഉറപ്പുനൽകുന്ന കാരണങ്ങൾ (ജോലി, കുടുംബം, ബിസിനസ് ബാധ്യതകൾ) കവർ ലെറ്ററിൽ ബോധ്യപ്പെടുത്തണം.
3. സുതാര്യമായ സാമ്പത്തിക രേഖകൾ (Financial Documents)
ബാങ്ക് അക്കൗണ്ടിൽ പണമുണ്ട് എന്ന് കാണിക്കുന്നത് മാത്രമല്ല സാമ്പത്തിക സുരക്ഷിതത്വം. വരുമാന നികുതി റിട്ടേണുകൾ (ITR), കഴിഞ്ഞ മാസങ്ങളിലെ ബാങ്ക് സ്റ്റേറ്റ്‌മെന്റുകൾ എന്നിവ കൃത്യമായി സമർപ്പിക്കണം. യാത്രയിലെ ചിലവുകൾ വഹിക്കാൻ തനിക്ക് തക്കതായ സാമ്പത്തിക അടിത്തറയുണ്ടെന്ന് അപേക്ഷകന് തെളിയിക്കാൻ സാധിക്കണം (ശിവാനിയുടെ അക്കൗണ്ടിൽ 15 ലക്ഷത്തോളം രൂപയുടെ ബാലൻസ് കാണിച്ചിരുന്നു).
ശ്രദ്ധിക്കുക: അടിസ്ഥാന നിബന്ധനകൾ മറക്കരുത്
-
വിസ ലഭിക്കാൻ എടുത്ത രണ്ട് ദിവസത്തെ സമയം വ്യക്തിഗത അനുഭവമാണ്; എല്ലാ അപേക്ഷകൾക്കും ഇതേ വേഗത്തിൽ വിസ ലഭിക്കണമെന്നില്ല. അപേക്ഷകളുടെ എണ്ണവും എംബസികളുടെ പ്രവർത്തനരീതിയും അനുസരിച്ച് ഇതിൽ മാറ്റം വരാം.
-
കുറഞ്ഞത് €30,000 (യൂറോ) പരിരക്ഷയുള്ള ട്രാവൽ മെഡിക്കൽ ഇൻഷുറൻസ് നിർബന്ധമാണ്.
-
ബയോമെട്രിക് വിവരങ്ങളും നിർദിഷ്ട രേഖകളും നിശ്ചിത വിസ ആപ്ലിക്കേഷൻ സെന്ററുകൾ (VFS Global തുടങ്ങിയവ) വഴി തന്നെ പൂർത്തിയാക്കണം.