വമ്പൻ ഹൈപ്പോടെ വിപണിയിലെത്തിച്ച് ലോകമെമ്പാടുമുള്ള വാഹനപ്രേമികളെ ഞെട്ടിച്ച ‘സൈബർട്രക്കി’ന്റെ (Cybertruck) നിർമ്മാണം അവസാനിപ്പിക്കാൻ ഒരുങ്ങി പ്രമുഖ ഇലക്ട്രിക് വാഹന നിർമ്മാതാക്കളായ ടെസ്‌ല. അമേരിക്കയിലെ ടെക്സസ് ഗിഗാഫാക്ടറിയിൽ നടക്കുന്ന സൈബർട്രക്ക് ഉൽപ്പാദനം 2027 പകുതിയോടെ പൂർണ്ണമായി നിർത്തലാക്കുമെന്ന് ടെസ്‌ല സിഇഒ ഇലോൺ മസ്ക് ‘എക്സി’ലൂടെ (X) അറിയിച്ചു.
പൂട്ടുവീഴുന്നത് എന്തുകൊണ്ട്?
ഭാവിയിലെ പൂർണ്ണ ഓട്ടോണമസ് ടാക്സിയായ ‘സൈബർക്യാബ്’ (Cybercab) നിർമ്മാണത്തിന് കൂടുതൽ സൗകര്യമൊരുക്കുന്നതിനാണ് സൈബർട്രക്ക് പിൻവലിക്കുന്നത് എന്നാണ് ടെസ്‌ലയുടെ വിശദീകരണം. നേരത്തെ മോഡൽ എസ്, മോഡൽ എക്സ് എന്നിവയുടെ നിർമ്മാണം കമ്പനി അവസാനിപ്പിച്ചതിന് പിന്നാലെയാണ് മൂന്ന് വർഷം മാത്രം പ്രായമുള്ള സൈബർട്രക്കിനും കർട്ടൻ വീഴുന്നത്.
-
പ്രതീക്ഷിച്ച വിൽപ്പന നടന്നില്ല: പ്രതിവർഷം 2.5 ലക്ഷം യൂണിറ്റുകൾ വിൽക്കുമെന്നായിരുന്നു മസ്കിന്റെ അവകാശവാദമെങ്കിലും, ഇതുവരെ ആകെ വിറ്റഴിക്കാനായത് 63,000 യൂണിറ്റുകൾ മാത്രമാണ്.
-
യൂറോപ്യൻ വിപണിയിലെ തിരിച്ചടി: സ്റ്റെയിൻലെസ് സ്റ്റീൽ അലോയ് ബോഡിയോടെയെത്തിയ വാഹനത്തിന്റെ ഘടന യൂറോപ്യൻ സുരക്ഷാ മാനദണ്ഡങ്ങൾ പാലിക്കുന്നതിൽ പരാജയപ്പെട്ടു. ഇത് വലിയൊരു അന്താരാഷ്ട്ര വിപണി നഷ്ടപ്പെടാൻ കാരണമായി.
-
വിലവർദ്ധനവും വിവാദങ്ങളും: 2019-ൽ വാഗ്ദാനം ചെയ്തതിനേക്കാൾ ഉയർന്ന വിലയിലാണ് 2023-ൽ വിപണിയിലെത്തിയത്. ഇലോൺ മസ്കിന്റെ വിവാദ നിലപാടുകളും വാഹനത്തിന്റെ ജനപ്രീതിയെ ബാധിച്ചു.
‘ലോകത്തിന് ആശ്വാസം’; ട്രോളി സോഷ്യൽ മീഡിയ
സൈബർട്രക്കിന്റെ നിർമ്മാണം നിർത്തുന്നുവെന്ന വാർത്ത പുറത്തുവന്നതോടെ സോഷ്യൽ മീഡിയയിൽ വലിയ പരിഹാസമാണ് ഉയരുന്നത്. “The world is healing” (ലോകം നന്നാകുന്നു/ശാന്തമാകുന്നു) എന്നായിരുന്നു ഇന്റർനെറ്റിലെ ഏറ്റവും വൈറലായ പ്രതികരണം. “സൈബർട്രക്കിന്റെ പ്രൊനൗൺസ് ഇനി was/were ആണ്”, “വഴിയിൽ കാണുമ്പോൾ ചിരിക്കാൻ മാത്രമുള്ള വകയായിരുന്നു ഈ വണ്ടി” തുടങ്ങിയ ട്രോളുകളുമായി നിരവധി പേരാണ് രംഗത്തെത്തിയത്.
ഇനി സൈബർക്യാബിന്റെ കാലം
സ്റ്റിയറിങ് വീലോ പെഡലുകളോ റിയർ വ്യൂ മിററുകളോ ഇല്ലാത്ത, പൂർണ്ണമായും സ്വയം നിയന്ത്രിതമായി ഓടുന്ന ‘സൈബർക്യാബ്’ റോബോടാക്സികൾ പുറത്തിറക്കാനാണ് കമ്പനി ഇനി മുൻഗണന നൽകുന്നത്. സൈബർട്രക്ക് കൂടി വിടവാങ്ങുന്നതോടെ നിലവിൽ മോഡൽ 3, മോഡൽ വൈ എന്നീ കാറുകൾ മാത്രമാകും ടെസ്‌ലയുടെ നിരയിൽ പ്രധാനമായും അവശേഷിക്കുക.