പാൽക്കടൽ കാണാൻ വീണ്ടും വഴിതുറന്നു; ദൂധ് സാഗറിലേക്ക് സഞ്ചാരികൾക്ക് പ്രവേശനം അനുവദിച്ച് വനംവകുപ്പ്

പനാജി: കാത്തിരിപ്പിനൊടുവിൽ സഞ്ചാരികൾക്കായി ദൂധ് സാഗർ വെള്ളച്ചാട്ടം വീണ്ടും മിഴിതുറക്കുന്നു. 2026-27 സീസണിലെ ഇക്കോ ടൂറിസം പ്രവർത്തനങ്ങൾക്കായി ദൂധ് സാഗർ സർക്യൂട്ട് തുറന്നുകൊടുക്കാൻ വനംവകുപ്പ് ഉത്തരവിറക്കി. കനത്ത സുരക്ഷാ മാനദണ്ഡങ്ങളോടെ സർവീസുകൾ ഉടൻ ആരംഭിക്കും.

ഗോവ ടൂറിസം ഡെവലപ്‌മെന്റ് കോർപ്പറേഷന്റെ (ജിടിഡിസി) ഔദ്യോഗിക പോർട്ടൽ വഴിയുള്ള ഓൺലൈൻ ബുക്കിങ് സൗകര്യം ഉപയോഗിച്ച് മാത്രമേ സന്ദർശകർക്ക് വാഹനങ്ങൾ ഉറപ്പാക്കാനാകൂ.

സ്വകാര്യ വാഹനങ്ങൾക്ക് നോ-എൻട്രി; ദിവസം 240 ട്രിപ്പുകൾ മാത്രം

സംസ്ഥാന വന്യജീവി ബോർഡിന്റെ (SBWL) നിർദ്ദേശപ്രകാരം പ്രതിദിന ട്രിപ്പുകളുടെ എണ്ണം 240 ആയി നിജപ്പെടുത്തിയിട്ടുണ്ട്. ഗോവ വനംവകുപ്പിൽ രജിസ്റ്റർ ചെയ്ത പ്രത്യേക ജീപ്പുകൾക്ക് മാത്രമാണ് സർക്യൂട്ടിലേക്ക് പ്രവേശനാനുമതി. സ്വകാര്യ വാഹനങ്ങൾ, ഇരുചക്ര വാഹനങ്ങൾ എന്നിവ പ്രവേശന കവാടത്തിനപ്പുറത്തേക്ക് കടത്തിവിടില്ല. ഒരു വാഹനത്തിൽ പരമാവധി ഏഴ് മുതിർന്ന യാത്രക്കാരെ മാത്രമേ അനുവദിക്കൂ.

ലൈഫ് ജാക്കറ്റ് നിർബന്ധം; ട്രാക്കിലൂടെ ഇറങ്ങരുത്

സുരക്ഷ ഉറപ്പാക്കുന്നതിന്റെ ഭാഗമായി കർശന നിയന്ത്രണങ്ങളാണ് ഇത്തവണ ഏർപ്പെടുത്തിയിരിക്കുന്നത്:

• ലൈഫ് ജാക്കറ്റ് നിർബന്ധം: ലൈഫ് ജാക്കറ്റില്ലാതെ ആർക്കും വെള്ളച്ചാട്ടത്തിലേക്ക് പ്രവേശനം അനുവദിക്കില്ല. സുരക്ഷയ്ക്കായി ലൈഫ് ഗാർഡുകൾ, ഫോറസ്റ്റ് ഗാർഡുകൾ, നേച്ചർ ഗൈഡുകൾ എന്നിവരെ മേഖലയിൽ വിന്യസിച്ചിട്ടുണ്ട്.

• ട്രാക്കിൽ നിന്നുള്ള പ്രവേശനത്തിന് വിലക്ക്: റെയിൽവേ ട്രാക്കിലൂടെ നടന്ന് വെള്ളച്ചാട്ടത്തിലേക്ക് ഇറങ്ങുന്നതിന് പൂർണ നിരോധനമുണ്ട്.

• മദ്യവും പ്ലാസ്റ്റിക്കും പാടില്ല: പ്ലാസ്റ്റിക് കുപ്പികൾ, ക്യാരി ബാഗുകൾ എന്നിവ വന്യജീവി സങ്കേതത്തിനുള്ളിലേക്ക് കടത്താൻ പാടില്ല. മദ്യം കൊണ്ടുപോകുന്നതും ഉപയോഗിക്കുന്നതും കർശനമായി നിരോധിച്ചു. യാത്രക്കാർ ചട്ടങ്ങൾ ലംഘിക്കുന്നില്ലെന്ന് ഉറപ്പാക്കേണ്ട ഉത്തരവാദിത്തം ജീപ്പ് ഓപ്പറേറ്റർമാർക്കും ഡ്രൈവർമാർക്കുമായിരിക്കും.