ന്യൂഡൽഹി: എക്സ്പ്രസ്‌വേകളിൽ മണിക്കൂറിൽ 120 കിലോമീറ്റർ വേഗത്തിൽ പോകുന്ന വാഹനങ്ങൾക്ക് അമിതവേഗത്തിനുള്ള പിഴ (ചെല്ലാൻ) അയക്കരുതെന്ന് കേന്ദ്ര ഉപരിതല ഗതാഗത വകുപ്പ് മന്ത്രി നിതിൻ ഗഡ്കരി. വേഗപരിധി ഇതിലും 20 ശതമാനം വരെ കൂടിയാലും (ഏകദേശം 144 കി.മീറ്റർ വരെ) പിഴ ഈടാക്കാതെ വിട്ടയക്കണമെന്നും, അതിനുമുകളിലുള്ള നിയമലംഘനങ്ങൾക്ക് മാത്രം പിഴ ചുമത്തിയാൽ മതിയെന്നും അധികൃതർക്ക് നിർദേശം നൽകിയതായി അദ്ദേഹം വ്യക്തമാക്കി.
കോൺഫെഡറേഷൻ ഓഫ് ഇന്ത്യൻ ഇൻഡസ്ട്രി (CII) സംഘടിപ്പിച്ച പരിപാടിയിൽ സംസാരിക്കവെയാണ് മന്ത്രി ഇക്കാര്യം വ്യക്തമാക്കിയത്. ഡൽഹി-മുംബൈ എക്സ്പ്രസ്‌വേ പോലുള്ള അത്യാധുനിക പാതകളിൽ നിലവിൽ വേഗപരിധി 100 മുതൽ 120 കി.മീ വരെയാണെന്നും, അനാവശ്യമായി ഡ്രൈവർമാർക്ക് നോട്ടീസ് ലഭിക്കുന്നത് ഒഴിവാക്കാനാണ് ഇത്തരമൊരു നിർദേശം നൽകിയതെന്നും അദ്ദേഹം പറഞ്ഞു.
“വേഗതയുടെ പേരിൽ റോഡുകളിൽ യാത്രക്കാർക്ക് നോട്ടീസുകൾ ലഭിക്കുന്നതായി ശ്രദ്ധയിൽപ്പെട്ടിട്ടുണ്ട്. 120 കി.മീ വേഗത വരെ നോട്ടീസ് അയക്കരുതെന്ന് ഞാൻ നിർദേശം നൽകിയിട്ടുണ്ട്. ഇനി 120-ന് മുകളിലാണെങ്കിലും 20 ശതമാനം വരെ വേഗത കൂടിയാൽ അവരെ വിട്ടയക്കുക; അതിലും കൂടിയാൽ മാത്രം പിഴയീടാക്കുക.” — നിതിൻ ഗഡ്കരി
ഔദ്യോഗികമായി വേഗപരിധി പുതുക്കി നിശ്ചയിച്ചുകൊണ്ടുള്ള ഉത്തരവല്ല മറിച്ച്, എക്സ്പ്രസ്‌വേകളിലെ പിഴ ഈടാക്കലുമായി ബന്ധപ്പെട്ടാണ് മന്ത്രി ഈ നിലപാട് വ്യക്തമാക്കിയത്.
എഐ അധിഷ്ഠിത ട്രാഫിക് നിരീക്ഷണം
ഹൈവേകളിൽ ലെയ്ൻ അച്ചടക്കം ലംഘിക്കുന്നത് കണ്ടെത്താനും ട്രാഫിക് നിയന്ത്രണം കൂടുതൽ ശക്തമാക്കാനും എഐ (നിർമ്മിത ബുദ്ധി) അധിഷ്ഠിതമായ ‘അഡ്വാൻസ്ഡ് ട്രാഫിക് മാനേജ്‌മെന്റ് സിസ്റ്റം’ (ATMS) നടപ്പിലാക്കാൻ വ്യവസായ ലോകം പിന്തുണ നൽകണമെന്നും അദ്ദേഹം ആവശ്യപ്പെട്ടു.
ഇ20 പെട്രോളിനെതിരായ പ്രചാരണം ‘പെയ്ഡ് പ്രൊപ്പഗണ്ട’
ഇ20 ഇന്ധനത്തിനെതിരായ (എഥനോൾ ചേർത്ത പെട്രോൾ) വിമർശനങ്ങളെയും മന്ത്രി തള്ളിപ്പറഞ്ഞു. ഇത് വെറുമൊരു വ്യാജ പ്രചാരണം മാത്രമാണെന്ന് ഗഡ്കരി ആരോപിച്ചു. 2022 മുതൽ രാജ്യത്ത് 4 കോടി കാറുകളും 20 കോടി ഇരുചക്രവാഹനങ്ങളും ഇ20 ഇന്ധനത്തിൽ സുഗമമായി ഓടുന്നുണ്ടെന്നും, എഥനോൾ മൂലം വാഹനങ്ങൾക്ക് വ്യാപകമായി തകരാറുണ്ടായെന്ന വാദത്തിൽ അടിസ്ഥാനമില്ലെന്നും അദ്ദേഹം കൂട്ടിച്ചേർത്തു.
